पाहणी दौऱ्यात मुख्यमंत्र्यांना शेतकऱ्यांनी घातले साकडे

सकाळ वृत्तसेवा बार्शी (जि.सोलापूर), ता. २३: ‘साहेब, आमच्या या भागात दर दोन-चार वर्षांनी दुष्काळाची अशीच परिस्थिती असते. शेतीसाठी आणि पाण्यासाठी आम्हाला निसर्गावरच अवलंबून राहावे लागते. यावर्षी तर पावसाळा कोरडा गेला, त्यामुळे दुष्काळाची तीव्रता अधिक आहे. पाणीच नसल्याने अनेक तरुणांची लग्नेदेखील जमत नाहीत. त्यामुळे कृपा करून कायमस्वरूपी पाणी द्या, ’ असे साकडे धानोरे परिसरातील शेतकऱ्यांनी मुख्यमंत्री देवेंद्र फडणवीस यांच्याकडे बुधवारी घातले.

दरम्यान, ‘शेतकऱ्यांच्या पाठीशी सरकार म्हणून खंबीरपणे आहोत. शेतकऱ्यांना मदतीबाबत सरकार येत्या दोन दिवसांत अध्यादेश काढणार आहे, ’ असे मुख्यमंत्र्यांनी सांगितले. धानोरे (ता. बार्शी) येथील ज्येष्ठ महिला शेतकरी दमयंती साहेबराव गादेकर यांच्या सुमारे पाच हेक्टर क्षेत्रातील पावसाअभावी करपलेल्या सोयाबीन पिकाची मुख्यमंत्री फडणवीस यांनी पाहणी केली. यावेळी मुख्यमंत्री फडणवीस यांनी शेतकऱ्यांशी संवाद साधला. बार्शीच्या सर्वच शेतकऱ्यांच्या पिकांचे मोठे नुकसान झाले आहे. सोयाबीनची पेरणीसाठी एकरी सुमारे ३५ हजार रुपये प्रमाणे १२ एकर क्षेत्रासाठी सुमारे चार ते पाच लाख रुपयांचे नुकसान झाल्याचे वंदना गादेकर यांनी सांगितले. यावेळी धानोरे येथील वृद्ध महिला शेतकरी दमयंती गादेकर यांच्यासह त्यांच्या मुली वंदना गादेकर, संध्या गरड आणि कुसळंबचे शेतकरी धनाजी काशीद यांच्याशी मुख्यमंत्री फडणवीस यांनी संवाद साधत मदतीबाबत त्यांना धीर दिला. मुख्यमंत्री म्हणाले, ‘बार्शी तालुक्याच्या क्षेत्रात सुमारे ९० हजार हेक्टरवर सोयाबीनची पेरणी झाली आहे. सर्वच सोयाबीनची अवस्था खूपच वाईट झाली आहे. शेतकऱ्यांना मदतीबाबत सरकार येत्या दोन दिवसांत अध्यादेश काढणार असून, पिण्याचे पाणी, शेतीसाठी पाणी, विद्यार्थ्यांचे शिक्षण, अन्नधान्य वितरणाबाबत मदत केली जाणार आहे, ’ असे मुख्यमंत्री फडणवीस यांनी स्पष्ट केले. आमदार अवतरले मुख्यमंत्री देवेंद्र फडणवीस कारंबा येथील शेतकरी अशोक भोरे यांच्या शेतात पीक पाहणीसाठी उतरले असता मोहोळ व उत्तर सोलापूरचे आमदार राजू खरे दाखल झाले. त्यांनी मुख्यमंत्र्यांना निवेदन देऊन उजनीचे पाणी पिण्यासाठी राखीव ठेवण्याची विनंती केली. आमदार

धाराशिव : मुख्यमंत्री देवेंद्र फडणवीस कळंब तालुक्यात दाखल होताच बुधवारी शेतकऱ्यांनी गराडा घातला.

पीक पाहणी दौऱ्यात शेतकरी दोन, नेते अनेक सोलापूर : मुख्यमंत्र्यांच्या पीक पाहणी दौऱ्यात शेतकऱ्यांपेक्षा नेते आणि वृत्तवाहिन्यांच्या प्रतिनिधींची गर्दी अधिक होती. प्रशासनाने दोनच शेतकऱ्यांची मुख्यमंत्र्यांशी भेट घडवून आणली. त्यातही या शेतकऱ्यांना मुख्यमंत्र्यांशी काय बोलायचे, याची अगोदर रंगीत तालीम घेतल्याची माहिती समोर आली. त्यामुळे उत्तर सोलापूरमधील शेतकऱ्यांच्या व्यथा मुख्यमंत्र्यांपर्यंत पोचण्याऐवजी निवेदनाच्या कागदावरच राहिल्या. मुख्यमंत्री फडणवीस यांनी बुधवारी कारंबा (ता. उत्तर सोलापूर) येथे दुष्काळाची पाहणी केली. विरोधी आमदारांची घोषणाबाजी येरमाळा (जि. धाराशिव): सुरक्षा व्यवस्थेमुळे शेतकऱ्यांना एका बाजूला बसवले होते. आमदार कैलास पाटील, आमदार प्रवीण स्वामी यांनी आपल्या कार्यकर्त्यासह सुरक्षेसाठी लावण्यात आलेला दोरखंडापलीकडे जाऊन शेतकऱ्यांना मुख्यमंत्र्यांना भेटण्यापासून रोखल्याचा आरोप केला. ‘दुष्काळ जाहीर करा’, ‘सरकार हमसे डरती है, पोलिस को आगे करती है’ अशी घोषणाबाजी केली.

राजू खरे एकदाही शेतकऱ्यांच्या बांधावर गेले नाहीत, असा आरोप केला जात आहे. मुख्यमंत्र्यांच्या दौऱ्यावेळी मात्र अचानक दाखल झाले.

‘आता सरकारच मायबाप’ येरमाळा (जि. धाराशिव): ‘‘पावसाअभीवी सोयाबीनसह खरिपातील अन्य पिकांचे शंभर टक्के नुकसान झाले आहे. पाणी, चाऱ्याचेही संकट आहे. कुटुंबासह जनावरांना जगवाचे कसं? आता सरकारच आमचे मायबाप आहे. दुष्काळ जाहीर करून आर्थिक मदत करावी, यंदाचेही पीक कर्ज माफ करावे’’ अशी साद चोराखळी (ता. कळंब) येथील शेतकरी पांडुरंग मैंदाड, मलकापूरचे रामहरी लोमटे यांनी मुख्यमंत्री देवेंद्र फडणवीस यांना घातली. चोराखळी, मलकापूर शिवरस्त्यावरील शेतातील सोयाबीनची फडणवीस यांनी बुधवारी पाहणी केली, शेतकऱ्यांशी संवाद साधला. दुष्काळ जाहीर करून शेतकऱ्यांना आर्थिक मदत करावी यासाठी निवेदन देण्यासाठी शेकडो शेतकरी दाखल झाले होते.

मुख्यमंत्र्यांचे बोल... चारा छावणी सुरू करू. शेतकऱ्यांकडून जास्त व्याजदर घेतलेल्या बँकांवर कारवाई करू. राज्यातील पाच धरणांमधील गाळ काढण्याची योजना असून, त्यात उजनीचा समावेश. उद्धव ठाकरे यांनी आत्मपरीक्षण करण्याची गरज पराभव होताच विरोधकांना निवडणूक आयोग आठवतो.

सुनेत्रा पवार यांचे पाहणीचे निर्देश मुंबई ः राष्ट्रवादी काँग्रेस पक्षाच्या सर्व मंत्री, पालकमंत्री, खासदार, आमदार, माजी आमदार तसेच प्रमुख पदाधिकाऱ्यांनी शेतकऱ्यांच्या बांधावर जाऊन प्रत्यक्ष नुकसानाची पाहणी करण्याचे निर्देश उपमुख्यमंत्री आणि पक्षाच्या राष्ट्रीय अध्यक्षा सुनेत्रा पवार यांनी आज दिले. त्यांच्या अडचणी बांधावर जाऊन प्रत्यक्ष जाणून घ्या, नुकसानग्रस्त भागांची पाहणी करा आणि आवश्यक प्रशासकीय मदत मिळवून देण्यासाठी तत्परतेने पाठपुरावा करा, अशा सूचना सुनेत्रा पवार यांनी दिल्या. शेतकऱ्यांच्या पाठीशी खंबीरपणे उभे राहणे ही आपली जबाबदारी आहे. राष्ट्रवादी काँग्रेस पक्ष आणि पक्षातील प्रत्येक पदाधिकारी, लोकप्रतिनिधी व कार्यकर्ता हा शेतकऱ्यांच्या अडचणीच्या काळात त्यांच्यासोबत आहे, हा विश्वास शेतकऱ्यांमध्ये निर्माण करा, असे आवाहन सुनेत्रा पवार यांनी केले.

वाऱ्यावर सोडणार नाही : शिंदे

अकोलाः ‘‘शेतकऱ्यांनी धीर सोडू नये. शासन त्यांच्या पाठीशी खंबीरपणे उभे आहे. शेतकऱ्याला वाऱ्यावर सोडणार नाही; भरघोस मदत करण्यात येईल, ’’ अशी ग्वाही उपमुख्यमंत्री एकनाथ शिंदे यांनी दिली. दुष्काळसदृश परिस्थितीची पाहणी करण्यासाठी उपमुख्यमंत्री एकनाथ शिंदे यांनी बाळापूर तालुक्यातील धधम व व्याळा या गावांना बुधवारी (ता. २३) भेट दिली. यावेळी ते बोलत होते. कामगारमंत्री, जिल्ह्याचे पालकमंत्री ॲड. आकाश फुंडकर, मृद व जलसंधारणमंत्री संजय राठोड आदी उपस्थित होते. उपमुख्यमंत्र्यांनी धधम येथे जी. टी. जाधव यांच्या शेतात व व्याळा येथील सविता वाशीमकर यांच्या शेताची पाहणी केली. व्यथा जाणून घेतल्या. ते म्हणाले, की शेतकऱ्यांच्या मदतीसंदर्भात लवकरच अधिसूचना काढण्यात येईल. शेतकरी हा जगाचा पोशिंदा आहे. त्यामुळे सरकारच्या तिजोरीवर शेतकऱ्यांचा पहिला अधिकार असल्याचे त्यांनी सांगितले. खात्यात मदत द्या : वडेट्टीवार नागपूर : मुख्यमंत्री व उपमुख्यमंत्र्यांचे पाहणी दौरे स्वागतार्ह आहेत; शेतकऱ्यांच्या खात्यात थेट मदत जमा करावी, अशी मागणी काँग्रेस विधिमंडळ नेते विजय वडेट्टीवार यांनी केली. मागील वर्षी सरकारने ३१ हजार ६२८ कोटींच्या मदत पॅकेजची घोषणा केली होती. २५३ तालुके आणि सुमारे ६८.७ लाख हेक्टर क्षेत्र बाधित झाल्याचे जाहीर करूनही प्रत्यक्षात घोषित मदतीपैकी निम्मीच रक्कम खर्च झाली आहे. यंदा शेतकऱ्यांना हेक्टरी किमान ५० हजार रुपये मदत आणि सर्व प्रकारची कर्जमाफी द्यावी, विशेष अधिवेशन बोलवावे. विरोधकांना विश्वासात घेऊन मदतीचे पॅकेज निश्चित करावे, अशी मागणी त्यांनी केली.

अकोला ः धधम येथे नुकसानग्रस्त पिकांची पाहणी करताना उपमुख्यमंत्री एकनाथ शिंदे.